عذرك بعد طول انتظارك وبعدك
ما نقبله والحر شوره براسة
كنت احسبنك غير وصلك يردك
في دولة العشاق عندك سياسة

لكن شورك ما هو بين يدك
شورك سجينً تحت ظل الحراسة
رجعت دارك بين ناسك وسعدك
ونسيتني والشوق معلن حماسه
خمسة شهورً عند عهدك ووعدك
واليوم قربك ما نريد التماسه

أنا حبيبيك صح ماني بعبدك
منته بقدي والمحبة مراسه
ويوم إنه عندي شي باجي لعندك
تعال عندي كان تبغي دراسة

خلك صريح وبعدها تشوف سعدك
عند المحبّة ما تفيد الدساسة
ودي توقد في المودة وودك
ومن كثر وده قام حظي وباسه
يا خدعت الأيام في مثل خدك
في وجهك البسمة وتخفي العباسة

لا تعتذر وتقول هالظرف حدك
من كان يبغي الشي يعرف قياسه
آخر مسج جاني من الشوق عندك
في ليلة اربع طعش ابريل ساسة

وأسهر وحيد الشوق يا زين وجدك
وأقول باكر يمكن الشوق جاسه
واثرك قتلت النار في وسط بردك
وما تنفعك باكر جموع الوناسه
اللي معاك يومين بعدين ضدك
أهل التملك والحكي والوساسه

ما عدت الوح يا غناتي لردك
ولا عاد يعنيني وجودك أساسه
النفس طابت بعد ماذقت صدك
عفته فؤادك بعد مالغير داسه

أنا الشموخ ان كان قبلك وبعدك
ما هزني خيل الوغى الوطاسة
بعدك وصدك وانكسارك وردك
ما يهمني والحب كسّر كاسه
لا تعتذر لو كنت مجبر ع بعدك
خل تنفعك يا زين هذي السياسة