قامت قيامة غلانا وإنت ما تدري
في غيبتك عن عيوني قامت قيامة
ما هيب في الكون يا أغلا الناس في صدري
ما بين شوقي وبين الصد وإجرامه

في الروح ساكن وفي وسط الدماء تجري
وإجرام صدك على خد الغلا شامه
وإن طال صدك وبعدك ما نفذ صبري
قلبي يسوق الغلا والصبر قدامه

حكمه وقد قالها العشاق من بدري
من يسلب القلب يقدر يسلب أحلامه
يا متلف الروح حبك في الحشا حصري
قلبي على درب حبك متعب أقدامه

لو مات حبي بقلبك ما نقص قدري
يبقى على الجرح قلبي شامخ الهامة
وأن ما تبي القرب يا أغلى جرح في عمري
إنساني أحسن ودفن الميت إكرامه