يا صاح أنا قلبي من الحب مجروح
جرحٍ عطيب ما لقى له مداوي

لو ينشرى قربه شريناه بالروح
مير البلا شوفه غدا به هقاوي

أهل دمع فوق الأوجان مسفوح
على الذي ما هوب للهجر ناوي

أنا أدري إنه مثلي اليوم مطروح
لا شك ما يقوى ولاني بقاوي

لو لاي أداري سر الأحباب لابوح
وأبيع بيعات الهبيل الفداوي

لكني أجحد فيه عن كل مفضوح
خوفي عليه من الحكي والدعاوي

حسبي على اللي حط في الدرب ساموح
العاذل اللي جر كل البلاوي

من أول باب المواصيل مفتوح
يوم إن عذال المودة خلاوي

واليوم سد الباب لوحين على لوح
وأمسيت أنا يا صاح قلبي شقاوي