مساء الخير يا باب الغلا والشوق والترحاب
ومساء الشعر يا كل القصيد اللي على بابه
تعطر بك هوا لندن نسايم جوها الخلاب
يا بابٍ كل من مرك محبه تعطر ثيابه

أنا جيتك غلا كلي صور بالذاكرة تنساب
يا بحر الجود وابيات الشعر لرضاك سكابه
أنا أتفدى حروف أسمك وأنا كلي غلا وإعجاب
يا أول حرف من أسمك وآخر حرف يتشابه

أنا جيتك من الدنيا وبعيني دمعتين عتاب
قفلك الوقت يا بابٍ بعد ما راحوا أصحابه
أنا أذكر كانت الدنيا يميل الزهر للعناب
وأنا أذكر كانت الوردة عشق من تحضن ترابه

تشابه يوم ميلادي وعنوانك يا ذاك الباب
يدله كل من يظمى شرب من جود سحابه
وأنا جيتك مثل غيري وخانت وقفتي الاعصاب
نزل دمعي على الماضي ونزل دمعي على عتابه

أريد أكتب من شعوري قصايد تذهل الالباب
شعورٍ يسكن بقلبي محال بيوم يتشابه
لأني أكتب إحساسي ولا أدور ثنا واعجاب
وأحاسيسي اترجمها وكل بيت أنا أولى به

أنا ما أدور الشهرة ولا ادور على الأسباب
أنا الشهرة تدورني وكلامي تحسب حسابه
وأنا ما أخلد الدنيا وتاليها قبر وتراب
ترى الاعمال مكتوبه وكلٍ بإيده كتابه