ألا يا طير

ألا يا طير صادوك الغرايب والأقدار
لو إنك حذر يا طير ما كان صادوك
ناديت لك مرة ومرات وأمرار
صاوختني وجاوبتهم يوم نادوك

أصرخ بعد واشكي بعد ليه تحتار
وتقول ليه بعزة النفس ذلوك
وهذي الحقيقه وش تبي عكس ما صار
وتعز لك ناس على ناس عزوك

إنته تظن أهل الوفا بالهوى إكثار
طالع ظنونك للأسف وين ودوك
يا ما نصحناك انتبه حولك النار
رجل على الجمرة ورجل على الشوك

هم صوروا لك حبهم شي ما صار
حتى شعورك وبالأحاسيس غشوك
ويا اللي نسيت إن الزمن دوم دوار
جازتني بالظلم وبالظلم جازوك

جابك زمانك عندنا وصار ما صار
نفس الخطى اللي ودتك أمس جابوك
والله وتوقعنا بتجي شايل أعذار
عارف خطاك بحقنا يوم خانوك

قلنا الهوى ما هو غصيبه واجبار
لو كان حبّك صادق إن كان حبوك
إحنا الأمل وإحنا الهوى وشمعة الدار
وإحنا الحبايب اللي ما يوم خلوك