سنة وشهور ما تسأل عن أخباري
وش اللي ماخذك مني سنة وشهور
وقف دربي عليك وفات مشواري
كأنك من صباحاتي محيت النور

ملامح صورتك ذابت على جداري
أخاف يذوب طيفك من زوايا الدور
أصدق كذبة ظروفك وأنا داري
أعرفك ما أنت في غيباتك المجبور
قسم باللي جعل إسمك من أسراري
يمر إسمك على صوتي بدون شعور

أنا مهما سترتك داخل أشعاري
ترى حبّك بعيني ماهو بمستور
عشان أسلى متى ما جابك الطاري
أروح أقرا عن الجنّة و وصف الحور

وأجي شايل كثير أخطاء لأعذاري
أنا المخطي وأنا العاذر وأنا المعذور
أبطفي شمعتي وابسدل ستاري
عن الحب القديم الباقي المهجور
تدور الأرض يومك أجمل أقداري
ولكن من تفارقنا ما عاد تدور