الشمس غابت وكلٍ دور سراجه
والشوق جمر ما حر الشوق لا جمر
دام إتجاهك شمال مودعك حاجه
سلم على حايل وسلم على شمر
قدامك الخافق اللي ينشد علاجه
كنه معلق على برزان ومسمر

وإنته تعرف يا بعد حيي من تواجه
بيضان الأفعال لا من الزمن سمر
إن ضاقوا أعنف من البحر وأمواجه
وإن راقوا أركد من الخرمان لا عمر
كم صيت بيتٍ عتق في الباب مزالجه
وكم شيخ أماره قبل تعيينه مؤمر

وكم حاتميٍ تكفي فلة إحجاجه
وش لون للضيف لو عن ساعده شمر
وإن مر تاريخهم متلبسٍ تاجه
كم عاشق كيف وكم حاسدٍ زمر
في جو أغلى على الرجلي إلى داجه
من ديرة السادس ومن ديرة معمر

كنه إلا أهدى له البراق فجاجه
خلت غريرٍ ضحك ومن الخجل حمر
وتوارثوا حرثه وتمتير ديباجه
ركابة الجيب من ركابة الضمر
الود لا غرس بدري صعب مخراجه
والله ولا ألذ وأحلى منه لا ثمر

أدخل على اللي تطوف البيت حجاجه
من ناقص عند مدح الغير يتذمر
والمدح لو كان في الرديان للصاجه
ويقال عمّر بلد بالعون ما عمّر
والذم لو زاد في الطيب تولاجه
لا أحرق ولا أغرق ولا عمّر ولا دمر

ماني بمتحسب بشعري على حاجه
إلا إني أروح ما غنيت في شمر
الشمس غابت وكلٍ دور سراجه
والشوق جمر ما حر الشوق لا جمر
دام إتجاهك شمال مودعك حاجه
سلم على حايل وسلم على شمر