يقصر زمان البعد ولّا معك طال
عندي الزمن وقف بيوم عرفتك
كل التفاصيل الصغيرة على البال
من يوم شفتك لين ما عاد شفتك

بعد الرحيل الموجعه الشوق قتال
أشوف بعضك بالوجيه وولفتك
أحس لك ما بين الأضلاع مرسال
وأتحسس دروبك ولا قد صدفتك

ذكراك ما تاقف على بعض الأطلال
صبيتك ف كاس السنين ورشفتك
أدنى وصوفك بسمتك مثل الأطفال
والباقي أبطي في الخيال إن وصفتك

يا مهره الأحلام والشوق خيال
لو هو بكفي كان من مبطي عسفتك
أقسى شعورٍ للغلا صعب ينقال
يثور في صدري وله لين يفتك