يالفاتنة بحسنك إلى حد الذهول
وأنعم من الغيمة وحبات المطر
كيف أكتبك يا هند ولا ويش أقول
وإنتي الخيال واسمك الحالة شعر

إنتي الأنوثة الطاغية وإنتي الخجول
وإنتي الجمال اللي على هيئة بشر
وإنتي اللي نورك من كثر ما به قبول
كلما ابتسمتي يكتمل وجه القمر

جمالك الأخاذ مو بس للعقول
ما جا في بال الدنيا مثله أو خطر
رسمة عيونك ضحكتك ذيك الخصول
زادت عجايبها وخلتها عشر

كنتي المحال وكنت أنا حلم الوصول
تم جابك الله كنك العمري عمر
ربيع وجا يختال ما بين الفصول
يضحك في وجه أيامي يملاها سفر

لك حب وإن قلتي أحسبه عرض وطول
شوفي الفضا تدرين حبي وش كبر
من كثرك أحيان يتملاّني الفضول
في حد في الدنيا يحب حد هالكثر