تعطيني الود وإلا تاخذه مني
يبلغك قلبي يالمقفي تحياته

اليوم يا صاحبي رد الخبر عني
ما يرخص الغالي إلا كثر غلطاته
جارت علي الليالي أخلفت ظني
والحب ما عوض الرجال ما فاته

أدعي شفوفٍ تجي برضاك ما جني
شاحت على الغالي اللي شفت زلاته

حمامة الحب فوق النايفة ظني
في واديٍ تطرب الأسماع جراته
قصايدي يوم مات الحب ينعني
في مقبل الوقت يالغالي سلاماته

ياللي برمح الغلا تسطي وتطعني
وأنا معك خافقي محبوس غاياته

تبي الحقيقة عظيم الشوق موهني
اليوم ساوى حسان الحب سياته
أببتعد عنك قدر اليوم ممكني
ما هو بعيبٍ يعاف القلب مشهاته

بغيت عنك العزا مره وردني
مشاعرٍ نصرها يلفح براياته

العام ولّا يجني اليوم ينهني
عن حبك اللي جروحي من نهاياته
لك ذكرياتٍ جميلة يوم مرني
ما وسعت خاطرٍ تسعى لمرضاته

واليوم لولا المودة ما ضحك سني
ما شن قلبي على فرقاك غاراته

نوازع الطيف ما جني وزارني
في وحدتي تهدي الخافق مسراته
هذا وأنا خافقي للحب ما حني
قلبٍ بعد به مكان حبه هيهاته