قلت المطر قالت: من اليوم ديمة
ما به رعد لا برق ما غير هتان
عشق جمع ما بين قاع وغيمة
سيلًا على صدر الثرى دمع الأمزان

همس النديم اللي يعاتب نديمه
صوت المطر كنه تعاتيب خلان
تبسمت لأجل الليالي القديمة
وقالت: تذكر؟ قلت: يا بنت نسيان

نقض الجروح اللي تشافت ظليمة
ما عاد به وصل ولا عاد هجران
ما للرجا في بعض الأحوال قيمة
وما للعمى صبح ولو بات سهران

لو للزمن عن نية الغدر شيمة
ما فرق أحباب ولا بعد أوطان
لا شك! وينك يا القلوب السليمة
اللي تجازى عن خطا الخل غفران

كلن خصيم وذاق لوعة خصيمه
واللي خصيم الوقت يا بنت خسران
قلت المطر قالت: من اليوم ديمة
ما به رعد لا برق ما غير هتان