طول ما قلبك لسه صافي
إوعى تزعل أو تشيل
إوعى حد في يوم يغير
طبع فيك طيب جميل
الحياة مش سهلة يمكن
والبشر بقوا شيء يخوف
بس ربك برضه قادر
يسندك لو يوم تميل
مها فتوني

مش هنرضي الكل يعني
ومين أساساً بيراضينا
مين في كل اللي إديناهم
من عيوننا كان شارينا
كل واحد يجي حبة
وياخد اللي في النصيب
وأما يمشي يقول ويحكي
ع اللي مش فينا وفينا
احمد سعد

شوف نصيبك فين وكمل
الحياة واسعة وطويلة
زي ما قابلت اللي كسرك
برضه في أشخاص جميلة
في كلام متقالش لسه
وفي أمل هتحسه تاني
واللي روحه كريمة حب
مش هيرضى بناس بخيلة
مها فتوني

بكرة جاي بناس نظيفة
وفيها خير عكس اللي فاتوا
بكرة أقابل حد صافي
يشوفني أعظم إنجازاته
لما أكون ماشي بأصولي
وأرضي كل اللي يروحولي
يبقى مش هزعل عليهم
أصلي عايش هما ماتوا
احمد سعد