وقاتل الجسم مقتول بفعلته
وقاتل الروح لا تدري به البشر

ياللي أمنتك على قلبي وخنت أمانتك
لو القلوب ليها محاكم كنت سجنتك
وكان زمانك دلوقتي واقف تبكي
وإتنين عساكر ساحبينك على زنزانتك

الوعد دين وإنت واعدني وحالف ليّا
سرقت مني سنين عمري وخليت بيا
حكيت حكايتي لكام قاضي ردوا وقالوا
غدر الأحبة في دنيتنا ما لهوش دية

وعوضي على الله
في شقايا اللي إترمى
يا أبو قلب جاحد
أنا كرهتك عمى
وإستنظر حسابك من قاضي السما

دماغي من السهر إتفلقت
وعينيك غفلت
ودموعي من القهر إتدلقت
وأمسك تفلت

أنا اللي كانوا الناس
على ضحكتي حاسدني
دلوقتي من الناس
والدنيا نفسي إتقفلت

وعوضي على الله
في شقايا اللي إترمى
يا أبو قلب جاحد
أنا كرهتك عمى
وإستنظر حسابك من قاضي السما