يا زمان العجايب وش بقى ما ظهر
كل ما قلت هانت جد علمٍ جديد
إن حكينا ندمنا وإن سكتنا قهر
بين قلبٍ عطيب وبين خل عنيد

لو تفيد المدامع كان أسيّل نهر
مير كثر التوجع والدمع ما يفيد
طاولتني همومي مع طويل السهر
ما تحمل ظلوعي لو ظلوعي حديد

أصبر أيام وأشهر وأتصبر دهر
وإن حصل لي مناتي جيت لوني بعيد
أرجي الله وأراقب كل طالع شهر
يجلي الهم عني أو عسى ما يزيد

يا غزال فضوح الزين عنه اشتهر
في عيوني ملاك ووسط قلبي وحيد
لو جحدت المحبة سقم حالي جهر
مير ما كل قلب ياصل اللي يريد