لي صاحب خذني بزينه
عن كل مزيون ورعبوب
روحي غدت لأمره رهينه
والقلب من نظراته يذوب

غض يعيش أول سنينه
ومن الدلع له طبع وأسلوب
خطر علي إن شفت عينه
من نور حسنه أمزع الثوب

الشمس في طلعة جبينه
والليل وسط العين مسكوب
والخد ينفح يا سمينه
مثل الشفق في حزة غروب

عوده شرات الموز لينه
فارع و رويان ومسلوب
تكسيه الأوصاف الحسينه
ومن المعاني لابس ثوب

قلبي معه ربي يعينه
عليه صابر صبر أيوب
مجبور يتحمل ضنينه
لو هو غدا بالحب مشغوب