يا الله لا تقطع رجا عبدك من العلم اليقين
في خليلٍ ما قطع وصله ولا عني سلا
ذاك لا مني طريته طاح قلبي في اليدين
وفزت عروقي تصوت مرحباً ألف وهلا

كل ما ضاقت لقيته يلوي ذراع السنين
همه أرتاح وما أحاتي هذا من زود الغلا

البلا لا قال أحبك سلهمت عينه حنين
البلا سلهام عينه هذا هو ساس البلا
من يلوم العين منهو لا أغفلت عن كل زين
من يشوف أوصاف خلي يدري وش معنى الحلا

لا قسى وقتي لقيته من طرف صبعه يلين
يا عسى ما أذوق حزنه لا عدم منهو خلا

ما يزين الجو أبد لا فضى له ما يزين
مير شوفه يبري العله ويغلي يا ملا
من يقول الحب بلاوي قلت زدها بلوتين
كل بلوى تشكر البلوى على قلب أبتلا

يا الله لا تقطع رجا عبدك من العلم اليقين
في خليلٍ لا لفاني راح همي وأنجلا