راحت علي ماجت على ما تمنيت
مدري خطا مني أنا أو خطا منك
كلي آسف كانك تشوف إني أخطيت
وكان الخطأ منك أنا آسفٍ عنك

خل الملامة كل ما أقبلت وأقفيت
تعب الوله في خاطري من تمننك
غالي علي غالي علي لو تغليت
بنيت لك في داخل الجوف مسكنك

يا أغلى علي من وقتي اللي تحريت
أشكي عليك من الوله وأشتكي منك
ياللي على كل المشاعر توليت
أرفق على قلبٍ على حبه أمنك

عز الله إني فيك ما قد ترديت
سبحان من ذا الزين بالزين لوّنك
آخر كلام إن جيت وإن رحت وأبطيت
قصر الزمان أو طال ما عني وعنك