تجيني يختلف حالي وأحس الوقت في صفي
كأن الوقت يضحك لي بعد ما كان مشقيني
تجيني وكل ما فيني على جيتك متحفي
كأني مت بغيابك وجيت اليوم تحييني

أنا باقي لي شوية وألاقي بغيبتك حتفي
ترى حالي صعب دونك ولا غيرك بيغنيني
عجز بالي أبد يهدأ ولا عيني قوت تغفي
تعبت أداري بدونك دموعٍ ما جفت عيني

أنا لا شفتك قبالي توقف دمعي ونزفي
وأحس إن نظرة عيونك عن العالم توديني
وأتوه وما أحس إلا حدود الكون هو سقفي
وأطير من الفرح كني ملكت الكون بيديني

تجيني وأشكرك وأشعر بشكراً معك ما توفي
أنا ممنون لك ياللي عن العالم مكفيني
حبيبي لو بقول إني أحبك ما هي تكفي
ولا هي كلمةٍ توصف شعور لك سكن فيني