يا خاطري والأماني بين شك وغير
هاذي بوادر جفا ولا علامتها
إن ما حصل لك وفا وإلا عدال الضمير
ما فيه موته لشوقك ما بعد ماتها

وما فيه دمعة وله ذخرتها بالنظير
لين أختلط طعم دمعي بإبتساماتها
نبضات نفس المشاعر والزمن بس غير
نرعى العهود الوثيقة بإستداماتها

ما أشد جرح الوله في وسط قلب كبير
يقذيه حمل الهموم ولوم مشمتها
وما أشد على الحر يوم إنه يقيد أسير
غير إختلاط المشاعر وإنقساماتها

يا شمس بين الضحى وقفاه تالي عصير
فرق اللقا والموادع في سلاماتها
يا غصن من تحت ظلك كل ما حل طير
ناح ومعه روح ناحت لك بنغماتها

للشوق عبرات ترقى ثم ترجع تحير
محتارةٍ من حياها وإلتزاماتها
يحثني عالوفا عهدي بعزم المسير
بمواقف ترتفع بي فوق هاماتها

في حق نفسك من الأشوار لا تستشير
غير الذي تكتفي به عن ملاماتها
ما دام ظني بخير وظن قلبي بخير
برعى مشاعر حياتي وإهتماماتها