ما تعيش القصايد في رجا من قرا
قبل مولد قصيدة كم توفى شعور
كنت أحيك السوالف لين صوتي سرى
وصرت أدور لصوتي أي سكة عبور

أخذ بخاطر اللي خاطره ما برى
غصب عن عين قلبي صار قلبي صبور
الحبايب منافي والرفاقة ذرى
عن هبوب الزمان وعن جفاف الصدور

جعلني فدوة اللي للمواصل شرا
واللي أقفت عيونه بالغياب معذور
آه وش حيلة اللي حط همه ورا
وكل ما لد شافه يسبقه بالحضور

ويتغافل حنينه بالخفا ما درى
لين مساه حزنه بالرضا والسرور
إنت مالك بصدري والضلوع إخشرا
غير وجهك وهمس بالمحاني جهور

قد ماني بكيتك بالشعر لا طرى
وقد ما دم قلبي لا ذكرتك يفور
صرت أنا والأغاني والقصيد أعشرا
لين خفت العواطف من غناها تبور

إن ظلمتك بغيابك من تحبه ترى
المسافة قصيرة والليالي تدور
دام الأعمار تفنى والجسد للثرى
من يبيح السنابل لو تموت الطيور