والله لولا الخوف من ربي وكرهي للذنوب
كان أقول إن التراب أبعد عليك من النجوم

يا إلهي تطمئن بذكرك أرواح وقلوب
لا إله إلا أنت نسجد له ولا غيره يدوم

يا العظيم اللي في علمك جنة ونار وغيوب
تنجي أمي من عذاب النار والقبر الكتوم

يمه الله اللي أعلم يوم أودعك مغصوب
يوم أحطك في القبر مدري أقوم أو ما أقوم

ما هقيت أمشي ولا خطوة ولا ألحق غروب
من عرفت إن الفراق اليوم صار أمر محسوم

صارت الدنيا تدور ولا عرفت الدرب نووب
مثل الأعمى صرت يمه ما علي بشرهة ونوم

الوكاد إني غديت بصوب والدنيا في صوب
والحياة الله يجيرك صارت أقسى من اللزوم

كل ما أذكرك يمه ينحرق شمع ويذوب
يختنق صدر المفارق كثر ما صار محروم

أذكرك وإنتي هنا وهناك يا صعب الهروب
وين ما أناظر أشوفك في عيوني كل يوم

أتخيل طلتك ومشيتك في هالدروب
حتى صوتك أسمعه نفس السوالف يا رحوم

صار بيتي في عيوني موحش وكله عيوب
من رحلتي لا خبر لا علم ولا عينٍ تنوم

ما بقى للبيت نور وما بقى للجرح ثوب
لا بقى إلا ذكريات بيني وبينك تدوم

يمه الله لا يعاقبني ولكني أتوب
ليت ربي ما خلق فرقى ولا موت وهموم

أدري الجنة تحت رجليك ولله الوجوب
أسأل الله الرضا والفوز يا الحي القيوم

والله لولا الخوف من ربي وكرهي للذنوب
كان أقول إن التراب أبعد عليك من النجوم

يا إلهي تطمئن بذكرك أرواح وقلوب
لا إله إلا أنت نسجد له ولا غيره يدوم