أنا تعبان من نفسي ولّا منك أنا تعبان
أبي أرتاح أبي أفهم وش أسباب التعب فيني
دخيلك بس أحضني ولا بحكي عن اللي كان
حنانك لمستك روحك دفا حضنك يكفيني

تعبت أذوب محتاجك وكلي ينتظر ولهان
تعبت أشكي على نفسي ولا غيرك يهديني
معك نيران تحرقني رغم هذا أنا بردان
وكل ضحكة من عيونك غصب عني تبكيني

أنا تعبان مو قادر تعبت أتنفسك حرمان
أدور أدورك لهفه وأضيع وما ألاقيني
ضميت لكاسك أترجى تخليني بعد ضميان
أبي أظمى بعد أكثر أبي أيديك تسقيني

بعذابي ووحدتي ساكت أكسر خاطر الجدران
أناظر وين ما أناظر أشوفك بيني وبيني
أذوب بناري من دونك مثل شمعة تذوب أحزان
مثل ريشة بمهب الريح طلبتك لا تخليني