كل عمري أسبوع
من ربوع لربوع
التعب للخفوق
وللعيون الدموع

وإن دخلت الخميس
قلت وين الجليس
آه كني حبيس
أنا وضي الشموع

كل جمعة تطل
ذكرياتي تهل
وأذكر أحلى وصل
والحبيب القطوع

لا بدا السبت صاح
صوت ذيك الجراح
من عشق ما استراح
حالمٍ بالرجوع

وإن ضواني الأحد
أسهر ولا أحد
شوقي ماله أمد
وقلبي ما هو بقنوع

صبح الاثنين عدى
وين أهل الموده
البحر زاد مده
وحبي ماله سطوع

والثلاثاء تمر
ليلةٍ من عمر
بين حلم وصبر
وانتظار وخضوع

ينتهي أسبوع ثاني
والأماني أماني
وإنت لو في مكاني
ما تغيب الربوع