غيمتك هلت على قاع العتب
سيلت صدق الغلا وأروت ظماي
كن قلبي طاح من بين الهدب
من غلا دمعة عيونك يا غلاي

إعتذارك رمح في صدر الغضب
ما ترك غير الفرح يسبق رضاي
صوتك الدافي على الجرح انسكب
حرك إحساس الوله وأشعل هواي

شفت سودك كيف عناها التعب
ذابلة من سحرها جابت قضاي
في عيونك حبي العذب إنكتب
ابتدى فيها وفيها منتهاي

كنت أبي لمعاتب عيونك سبب
لين جاني عذرك أكبر من سماي
وبلك الطاهر ملى قاع العتب
وأزهر إحساسي وربع لك رضاي