على يدينك إذا تسمح تكرم بدل أوضاعي
إذا لي خاطراً عندك تصرف لا تخليني
لغيرك مستحيل أشكي وأبين له عن أوجاعي
أنا ما أبغى بهالدنيا سواك أحداً يواسيني

أنا المحتار يوم إنه دعا قلبي لك الداعي
دواعي الشوق يالغالي تبعدني وتدنيني
معاناتي علي تفرض أقول القلب ملتاعي
أجامل والمجامل بالنهاية لك يوديني

تمنيتك تساعدني أفل ف بحرك شراعي
توقعت إن يدينك بالحقيقة تسبق إيديني
على يدينك ترى للصبر وسط الجوف مرباعي
أشوف الهجر وإلا الوصل يالغالي يداويني

يطول الهجر أو يقصر تزايد فيك أطماعي
مودتنا على قلبي عزيزة لا تعنيني
على يدينك إذا تسمح تكرم بدل أوضاعي
إذا لي خاطراً عندك تصرف لا تخليني