غرام أطفال جمعنا وكنا بالشعور كبار
وفا قلبي مثل ما توفي العشاق أو أكثر
أحب بجد ما ألعب مثل منهو في سن صغار
ولا أذكر قلبي لو مرة معاها كذّب وقصر

في ذاك الوقت ما أكتب ولكن أحفظ لشعار
عشان إعجابها فيني يزيد ويصبح الأكبر
حفظت لخالد الفيصل قصيدة يا غريب الدار
وديوان البدر كله عشان أتعلم وأبحر

بنيت لحبها قصرٍ عظيم وعالي الأسوار
ولا فكرته بيومٍ على ذا الحب بيدمر
غرامٍ كنت له شاري وباع بآخر المشوار
أنا عقب الغدر هذا أنا وشلون ما أتأثر

بكيت بيوم فرقاها تقل بين الحنايا نار
وكني فاقد الدنيا ولاني قادر أتصبر
أبتأسف أنا لقلبي عسى يتقبل الأعذار
لأني صدق ذليته وعذري حيل متأخر