خذ ماتبي بس اترك القلب يرتاح
لا بالمودة عطيته
لا بالصراحة خذيته

في غايتك تهوى على ملك الأرواح
صدقي خيانة جزيته
ويا كم بغيري نويته

كافي علي أصبحت بالسد فضاح
غصبٍ عليه حكيته
بكاني حظي وبكيته

قل لي متى ترسم على قلبي جراح
منك الصبر ما قويته
أفقدتني ما احتويته

أملكتك القلب الوفي ومعك مفتاح
عقب الندم وش رأيته
عن حب غيرك عميته

من علمك ترمي بقيعان الأرماح
لا بالقتل نويته
عمري بكفن حي طويته

جذعٍ ذوى عطشان لو ترفعه طاح
تتعب معه لو ركيته
ما هو بحي لو سقيته

لا تنتظر رجعه ولا تطري اصفاح
ما أقول حبك وطيته
ما أقول حبك نسيته

أبعد عسى في دربك اليوم ترتاح
إنت الذي أهتويته
لا بالغصيبه مشيته