لا تشتكي همك لغيرك من الناس
ما عاد به في الناس من تشتكي له
ورجل من أفعاله تحطه على الراس
وإن ضاقت الدنيا يشيل الثقيله

ورجل تحسبه تاج عز ونوماس
ولا صكت الصكات يطفى فتيله
ورجل طليق أحجاج طيبه على ساس
بحماه ما تشكي من الوقت ميله

ورجل تحسبه من ذهب وأثره انحاس
عند اللوازم ينكسر ساق خيله
ورجل على الفزعات من دون مقياس
يجلي غبار الوقت لا سال سيله

ورجل تحسبه في الهدد طير قرناس
ويصير بوم ويلحقك بالفشيله
ورجل خويه لو شكى الضيم والباس
ما يهتني في صبح يومه وليله

يقدم كما يقدم على السطو هرماس
النادر بطبعه ونادر بجيله
له في سنام العز موضع ومجلاس
ودايم وله بالعز راس الطويله