خذ راحتك ما عادها تفرق معي
تبي تغيب ونفترق خذ راحتك
شكرا على ذوقك وبس لا تدعي
إنك صريح وشكرا لصراحتك

ما كان غيرك في حياتي مطمعي
في قلبي الأوحد وقلبي ساحتك
من كل درب ودرب أسعى لك سعي
وأمواج حبي من غلاك اجتاحتك

كم كنت أحبك في الوعي والإ وعي
والأرض أرضك والسماء مساحتك
لك كنت خاتم وإنت خاتم بأصبعي
وأتعب على شانك وأدور راحتك

وتشوف من فوق السحايب موقعي
إلين طيحت النجوم وطاحتك
وألحين ما عادت ترى تفرق معي
جنتك ما أبيها ولا تفاحتك