يا قديم الغوص في بحر الهوى
وش لقيت بغبة البحر الغزير
علم اللي جس شطه وأهتوى
ما بعد جرب طويلة والقصير

قالوا إنه من جميع أمر حوى
فيه سر وفيه شر وفيه خير

وأسمع إنه من ركب موجه دوى
من فعل موجه غريقة يستجير
وأسمع إنه من لمس شطه غوى
ما يفرق بين بحره والغدير

وأسمع إنه من على تركه نوى
يجذبه سحره ويرجع له كسير

لو تجرح فيه قلبه واكتوى
ما يتوب ولا يريح ويستخير
وش جمع حلوه على مره سوا
هي حلاة الحب في الكاس المرير

رغبوني لين قلبي له هوى
وأنذروني لين صدقت النذير

خوفوني منه والقلب التوى
راغبٍ ومعيف والخايف يحير
هو صحيح إن الهوى ما له دوا
خبر اللي جاك عاني يستشير

يا قديم الغوص في بحر الهوى
وش لقيت بغبة البحر الغزير