هلا باللي سبى قلبي وأخذني حسنه بقوه
سلب روحي وأخذ صبري وأنفاسي من يديه
أحس إنه لعب بالقلب لعبة شاطر وموه
يبعثرني ويجمعني رجا وأحلام ورديه

إذا نور ظلام الليل عرفت إن الفجر ضوه
تبسم من جبينه مبسم الصبح وضحك ضيه
وإذا سلهم برمشه طرت من جوي إلى جوه
ورحب به خفوقي غصب عني قال يا حيه

أثاريني بحسنه طحت وأنا أظن الهوى توه
فكيف إن الهوى توه وأنا غرقان في طيه
تعلقته وصار اليوم نو القلب من نوه
مع إني قبل هذا اليوم كانت نيتي نيه

قبل يطري الحسن حسنه لفظ قبل اسمه سموه
تسامى به سنا الحسن وسرت له سحب وسميه
تقول أرفق بمن حبّك وعقب اللي تبي سوه
ترى ميتك إذا شافك ترد الروح به حيه

حبيبي خاطري عن ما بدا له عبر ونوه
ومن شرواك يفطن وإنت شمس الخاطر وفيه
إذا كان الحيا يمنعك ما تمنعك لمروه
وإذا خايف من الحساد قل لي طاحت الحيه