العاصفة ما هيب من برق ورعود
من رمش عينك يا جنون الطبيعة
في غيبتك كني مع الموت موعود
ضاق الفضا بي قبل وجه الوسيعة

محلاك يوم ما تغيب يا زين وتعود
وألقى عيونك بابتسامة سريعة
فرشت لك درب الغلا فل ورود
لبيه لك كل المشاعر مطيعة

أدري على حبك من الناس محسود
واللي شرانا عمرنا ما نبيعه
غالي ولا من غبت في القلب موجود
وأسوار حبك في خفوقي منيعة

يا الراقي يا الجذاب يا سيد الخود
يا جنة أحلام الغرام وربيعه
مادام حبك في حشى الروح مفقود
مالي بحب أهل النفوس الوضيعة

دام المشاعر كلها تنقض عهود
لا للجفا لا للزعل والقطيعة
إنت الوحيد اللي ليا غبت مفقود
صوت الجفا راعي الغلا ما يطيعه

بدت في شف اللقا كل مجهود
أصبر وكبدي من فراقك وجيعة
أشتاق لك والشوق ما يعرف حدود
ولشوفتك ما أصدق ألقى ذريعة

الحب غاية قلب والزين مقصود
عفيت عن بعضه وجاني جميعه
العاصفة ما هيب من برق ورعود
من رمش عينك يا جنون الطبيعة