يا ناس راح عبيد مني غدى وضاع
والعقل عقب عبيد تايه وضايع
أقفى وأنا وقت الضحى في حزة اقداع
كنا على القهوة نقول الروايع

لو انصدم كان يا ملا الخبر شاع
تفزع له العالم ولو هي هجايع
ما اعتقد شاله من الباب طماع
قصده يدور من وراه الطمايع

عمره ثلاث سنين ماهو برضاع
ما اظنه اقفى يا مخاليق ضايع
في الحلم اشوفه يأشر لي بالأصباع
ويفز من نومه إذا صحت فايع

أسمع بكاه اليا من اصغيت الأسماع
وأحس به لا من ظمى وصار جايع
وأشوفه اليا نام نومه على ذراع
يصيح يبي أمه تجيه بفزايع

يا عبيد أنا كثرة همومي والأوجاع
وفي كل لحظة بتزيد الفجايع
لو رجعتك يا عبيد تشرى وتنباع
لا شريك مهما كثروبك طمايع

يا الله تفرج كربتي يا الولي بساع
يا واحدٍ يمشي لك العبد طايع
اشكيك ثم اشكي لمن عنده سناع
ترحم قلوب مع بعضها ولايع

وأشكي لكل مخلوق يمشي على القاع
يرحم فؤاد أم لها طفل ضايع
هذي حقيقه يا ملا ماهي ابداع
قصة ضياع عبيد حلو الطبايع