من خصايص عنود الصيد كثر الطواري
وعادة الظبي يجفل لا تحرك ظلاله

ما يصيد الجوازي كود بخص وضاري
القنص بالركاده والتسرع جهاله

ولا يعرف الطرد من لا يعرف الصحاري
ما تعرض سموم ولا تعرض شماله

كل درب عليه من المخاليق ساري
للسوالف رجال وللشكاله رجاله

وإنت عشقة حياتي يا غزال البراري
اتفاول بوجهك سعد من صرت فاله

إنت والله حبيبي وإنت والله داري
ان نظرة عيوني يم غيرك جماله

ماانقطع سيل حبّك بالمعاليق جاري
كنّ قلبي خلقه الله لحبك سباله

ليلتي ياقمرها غار منها نهاري
حيث وصل الموده همسة في لياله

جعل واهج غرامك مثل وجدي وناري
مير ما أظن في دنيا المحبّة عداله