يقول من عدى على رأس عالي
رجمن طويل يدهله كل قرناس
في راس مرجوم عسير المنالي
تلعب به الأرياح مع كل نسناس

في مهمهن قفرن من الناس خالي
يشتاق له من حس بالقلب هوجاس
قعدت في راسه وحيد لحالي
كني براس الرجم مذبوح الراس

متذكر في مرقدي وش جرالي
وصفقت بالكفين ياس على ياس
أخذت اعد أيامها والليالي
دنيا تقلب ما عرفنا لها قياس

كم فرقت ما بين غالي وغالي
لو شفت منها الربح ترجع للإفلاس
يقطعك دنيا مالها أول وتالي
لو أضحكت للغبن تقرع بالأجراس

المستريح اللي من العقل خالي
ما هو بلجات الهواجيس غطاس
ما هو بمثلي مشكلاتة جلالي
أزريت أسجلهن بحبراً وقرطاس

حملي ثقيل وشايله بإحتمالي
وأصبر على مر الليالي والأتعاس
وأرسي كما ترسي رواسي الجبالي
ولا يشتكي ضلع عليه القدم داس

لا خاب ظني بالرفيق الموالي
مالي مشاريهن على نايد الناس
يا عل قصر ما يجي له ظلالي
ينهد من عالي مبانيه للساس

البوم في تالي هدامه إيلالي
جزاك يا قصر الخنا وكر الادناس
لا صار ما هو مدهلاً للرجالي
وملجا لمن هو يشكي الظيم والباس

نشوف فيها الديد حان متوالي
مثل الرعاف بخصر مدقوق الألعاس
وينثر على البيدا سوات الزوالي
يشرق حماره شرقة الصبغ بالكاس