اسأل ظلام الليل عني يقول لك
إني معاه دايم إلى طلعة النور
اسأله قل له عن عشيقٍ وهب لك
قلبه وما يملك من إحساس وشعور

رسمت في قلبه حدود وعزف لك
أحلى كلامٍ سجله قلب مجبور
مجبور في نظرة عيونك وشكلك
رغم التدلل والتجافي والغرور

دايم تجافيني وأجيك أعتذر لك
وتخطي بعد وأقول آسف ومشكور
غصب أتحمل منك ميلك وعدلك
بصبر على ظلمك لو القلب مقهور

إلا نهيت النفس منك خفق لك
قلبٍ يودك يرفض البعد ويثور
باقي حياتي لك تراها فدا لك
وما فات من عمري لكم قلت منذور

حبري وشعري والورق ما وصف لك
ما كان كنه قلب عاشق ومسحور
واسأل ظلام الليل عني يقول لك
إني معاه دايم إلى طلعة النور