سلام والمركب عليه اثنين والساعة تدور
والموج هادي والوعد قدام والرحلة ذهاب
إن غابوا الأجواد ما غابوا من أقفاص الصدور
دق الجرس والعلم عجل به بعد طول الغياب
ناصر القحطاني

يا مرحبا يا صاحبي وأعبر بنا سبع البحور
علي أدير البوصلة وإنت الله الله فالزهاب
أنا سمعت أنك تحديت الذيابة والنمور
والعام لك قلبٍ خضر واليوم ما كنك شباب
خالد عبدالرحمن

الوقت قاسي والفتى يبقى على الشدة صبور
وإن ما غدا الرجال ذيب يطيح بأنياب الذياب
حتى الصديق الله وكيلك صار دمه ما يفور
وأنا لقيت الأصدقاء معظمهم أشبه بالسراب
ناصر القحطاني

لا تأمن الدنيا ولكن لا يجي قلبك فتور
أحدٍ يشوف أحلى البنات ولا يجي فيه إنجذاب
ما للحباري في القنص يا كود هدات الصقور
وإن ما كفخ طير الفضا معناته إن الراس شاب
خالد عبدالرحمن

كلش ولا قطع الرجا في الطيبات من العطور
لكن على شرع الله وسنة نبيه والكتاب
بيض العذارى عسجديات الجسد ضمر الخصور
سود العيون مجدلات الروس تلعات الرقاب
ناصر القحطاني

بالله قلي ما برى جرحك بعد بدر البدور
ما عوضوك الفاتنات الذاهبة والجرح طاب
كم واحدٍ لو مرته مزيونةٍ بعمر الزهور
ضاعت علومه والصواب الله يجيبك يالصواب
خالد عبدالرحمن

أحدٍ على الدنيا وهو كنه من أصحاب القبور
وأحدٍ يجي ويروح مع خله وهو تحت التراب
ياللي نسيت إن الهوى يبقى على مر العصور
بنشدك عن برقٍ سرابك وإنت من فوق السحاب
ناصر القحطاني

معلمك يا صاحبي بالسالفة والعلم نور
وش بك تقول الشمع ذاب الشمع ما يمديه ذاب
والبارق اللي مرني وأنا أدعي بقلبٍ شكور
هذاك خير طاح بأرض الغير والرب أستجاب
خالد عبدالرحمن

وش بينك وبين المدينة والشوارع والقصور
ما قد شبعت من الخلا الخالي ومن روس الهضاب
الناس ما تبطي ولو راحت مراويح الطيور
ترمي تعبها في البيوت وتستريح من العذاب
ناصر القحطاني

البر يشرح كل صدر ويقلب الضيقة سرور
وأنا إلى جيته يمر الوقت ما أحسب له حساب
يا ما حلا طوي الخبوت وسجة الخاطر شهور
ولا معك غير النشامى اللي يعزون الجناب
خالد عبدالرحمن