سجه مع الهاجوس طبيعة لي
طبيعةٍ باموت ما جزت عنها
أشكي على الخلاق وأرفع له أيدي
لا كثرت الأفكار يفك منها

أما الكرم قد فاز به حاتم الطي
حتى الفرس من شان ضيفه طعنها
خلوني أكرم في حياتي وأنا حي
ولا مت مدري جثتي من دفنها

خلقت بالدنيا وأنا ما معي شي
وبروح منها ما معي شي منها
يا جاهل الدنيا تراهي كما الفي
يا مخبل اللي في حياته ومنها

إن ناحرت لك قامت تروح وتجي
مثل الذلول اللي طويل رسنها
وإن دبرت خلتك طايح ومرمي
وكم واحدٍ له حاجة ما ضمنها

مسكين ياللي تحسب الواجد شوي
والعافية لو تنشرى وش ثمنها
لابد ما نرحل عن المزح والغي
ونسكن بيوت قبلنا من سكنها

النفس مثل الغصن عايش على الري
ولولاه كل الناس عافت وطنها
يالله عسى الحسنات تقضي على السي
لا قربوا للنفس ذرعة كفنها