كلما نسنس من الغربي هبوب
حمل النسمة سلام
وإن لمحت سهيل في عرض الجنوب
عانق رموز الغرام

لك حبيب ما نسى
كلمته دايم عسى
أطلب الله وأرتجيه
صبح يومي والمسا

كل زين أشاهده وإنتم بعيد
منوتي ليتك معي
وإن سهرت الليل أهوجس بك وأعيد
هل لأجلك آه مدمعي

وإنت هاجس خاطري
وإنت فرحة ناظري
يا قريب ويا بعيد
فيك أمسي وحاضري

نشوتك تلعب مع قطر المطر
وانتشى قطرة معك
والسحاب يطاردك بين الشجر
خالق الزين أبدعك

الندى في وجنتك
صار عطر بلمستك
والهوى غنى طرب
تستثيره بسمتك

كلما ضمت عيوني منك طيف
يا بعد كل الطيوف
قلت ما مثلك على الدنيا وصيف
لا حشا مالك وصوف

لا سحاب ولا مطر
لا نسيم ولا زهر
لا طيور ولا غزال
ولا مع باقي البشر