صبرت وشفاد بك صبرك أنا كم قلت لك مابيك
خلاص أبعد ترا قربي بطوعي مو غصب وإلزام
أنا واحد ولا مثلي ولا غيري أحد يغنيك
مميز نادر وصفي مثل بصمه من الابهام

تعلق في طرف هقوى على رجوة أنا بآجيك
أنا ويّاك ما نصلح بهالدنيا كفاك اوهام
يمرك حلم يمرك طيف يمرك هاجس يشقيك
تمر ذكرى يمر طاري ولكن جيتي أحلام

عطيتك وقت من عمري عرفت إني خطا معطيك
ومن طيبي تحسب إني ابرجع صدق ما تتلام
كذا ياصقري الجاهل إذا ما ثمنك يشويك
يحسب الناس هي لعبه تقل ماهي بشر أصنام

كرهتك وش تبي اكثر كرهت اسئلتك وطاريك
تسائل! خمن اجوبتي طلبتك ما أبي استفهام
بعد هذا الحكي لو جيت حشى و الله لا يحييك
زمان اغبر معك عشته عسى الاجمل يجي قدام