في الأول وأنا لسه بعيد
كان بيقول أشعار فيا
صوت ضحكتي كان أغنية
وإللي بيلفت نظره لواحدة
إنها ع الدنيا قوية

في الأول وأنا لسه بعيد
كان بيحب إني ذكية
مهما ألبس حلو عليا
قالي مشفتش زيك واحدة
ومحدش يشبه ليا

بعد ما طالني وخد قلبي ما بقاش مرتاح
فضل الحلو يقل يقل لحد ما راح
فجأة كلامه إتغير عني وميزاتي إتقلبت لعيوب
أتاريه كان بيقرب مني علشان الممنوع مرغوب

في الأول كان حلم جميل
وقت ما كان بيقربلي
قبل ما بطلب يتجابلي
قال إن أنا أجمل أمنية
وما حبش أبداً قبلي

في الآخر بقى حملي تقيل
وإللي الأول كان شاده
بقى مش عاجبه وبقى ضده
حتى جمالي وسحر عينيا
بقى مش حلو وعلى قده

بعد ما طالني وخد قلبي ما بقاش مرتاح
فضل الحلو يقل يقل لحد ما راح
فجأة كلامه إتغير عني وميزاتي إتقلبت لعيوب
أتاريه كان بيقرب مني علشان الممنوع مرغوب