يا كثر كذبك علي ويا كثر صبري
طولت بالي ولكن ثارت أعصابي
ما عاد ينفع أخلي الضيق في صدري
وأجاملك وإنت ما تسوى على حسابي

أثر الخيانة في دمك تكبر وتجري
وأنا على نيتي ما أشك في أحبابي
خصوصا إنت الوحيد اللي مثل عمري
إن غبت عني أضمك بين الأهدابي

صحيح أحبك أحسب إنك على خبري
تموت لو مرت أيام على غيابي
يومك تجيني ولا تسري إلين أسري
طرفك إذا شافني أقبلت هلا بي

راحت سنين من عمري وأنا ما أدري
إثرك تسلى على حبي وتلها بي
والله محد سبقك اليوم في غدري
لكني أستاهل اللي صار بأسبابي

وشلون أقدرك وإنت مرخص قدري
وشلون أميزك في عيني وفي كتابي
اللي كتب قصتك يمحاك من فكري
والله ما تفرح بقلبي وتهنا بي