داعب لي الأوتار يا عازف العود
روحي دهر وعروق قلبي ضمايا
ضامي نغم والصدر ضايق مسدود
والشوق شب النار بين الحنايا

نادمني اللي وطربني بزود
سمعني أنغام الصبا فالصبايا
حيلي من اللي سافر اليوم مهدود
ودموع عيني من فراقه همايا

لو شفتني موجود ما نيب موجود
جسمي معك وأنا بعيد النحايا
ثوب الصبر مني تشقق ومقدود
ما عاد لي حيل يشيل الرزايا

راح وخذا روحي معه ناعم العود
فرقاه عني من عظيم البلايا
يا ليت لي جنحان وأطير يا سعود
وألحق بعد روحي جميل السجايا