ليتك تحس في داخلي كيف مغليك
كيف العيون تشوفك بها عجايب
بين الضلوع الخافية دوم بخفيك
أقرا عليك من الحسد والمصايب

لا مر طيفك في خيالي وأنا أطريك
تنظر عيوني لاهب الشوق يايب
أدعي ف صلاتي لي مروره يعافيك
ياللي غرامك داخل القلب صايب

العين ما تعلى عن الحاجب أعنيك
إنته نظر العيون وأغلى الحبايب
إن غبت عن عيني ترى دوم تبكيك
صابر عليك وصبري صبر شايب

أزعل جميع الناس وبالذات أرضيك
لو وقفوا ضدي سرايا وكتايب
ما رد دونك يا منايا وأنا أبغيك
لو وقفوا حسبي عليهم حسايب