مالك رجا يا قلب فيهم ولا لي
حيله على نسيانهم لو تناسيت
راحوا وأنا عايش وحيداً لحالي
تايه ولا لحظة بعدهم تهنيت

هذا جزا من كان يسهر ليالي
يا ما عليهم في دجى الليل ونيت
لجل الوفي أشقيت فكري وبالي
كل نسى الماضي وأنا أقول يا ليت

راح الزمان اللي نعيمه صفالي
مثل السراب اللي من أجله تعنيت
صار الشقا والهم فوق إحتمالي
عقب التصافي بالتجافي تجازيت

ما باقي إلا ذكرهم في خيالي
ذكرى تجيني كل ما أصبحت وأمسيت
يا قلب لا تبكي على ضيم حالي
إنسى ترى مالك رجا وإن ترجيت