تبطون ما ذقتوا مشاعر خفوقي
قلبي سلبه اللي ما تسوون ظفره
ذاك الذي استسلمت له عروقي
كل الكبر فيني تهاوى بنظره

مثلي ما ينصاع الأمر مخلوقي
لكن مثلك كيف ما أنصاع لأمره
ما حق أشوف إنسان له قدر فوقي
إلا حبيبي تاج عالراس قدره

الحر يبقى حر لو بالسبوقي
قيده صقاره حبيسن عوكره
و أنا سبوقي جمر نيران شوقي
ان غبت شبت داخل الصدر جمره

على القا ياما أتعنى شفوقي
شوفك نهر و إنت إتمنن بقطره
مثل الذي له قصر بابه إمغلوقي
بالموت يدخل كل محتاج قصره

محاسنك بدعه تزين طروقي
أظلمك إذا شبهتك أبنور قمره
كانك مشكك بختياري وذوقي
بمرايتك شوف إختياري وندره

بمرايتك تفسير معنى الشروقي
شوف المرايا وقول لله دره
الحب غصن إذا أثمرن العذوقي
تذكر إنه كان في يوم بذره

لا يثمر إلا كل حبٍ صدوقي
أوله نظره وآخر الحب حسره