فوق فوق وفوق يا راسي
في شموخ وعز مطلاعه
وع الثريا دوم مجلاسي
منقهر ياللي على قاعه

إن عطيت أعطي من إحساسي
والكرم طبعي من أطباعه
هوب طبعي أتبع الناسي
ولا إنخلقنا ناس تباعه

الكرامة درّ وألماسي
ما لحقها سوم بياعه
طبع من ربعي ومن ناسي
ما رضيت الذل لو ساعه

ما تحرك بالجفى باسي
ومن قطعني زدته إقطاعه
الجبل مهما حصل قاسي
ما يهزه نود ذعذاعه

عزمي اللي ماله إقياسي
ولا نقصني عزم وشجاعة
مركبك خله طرف راسي
والبحر لا تبتلي بقاعه

با يلفك موجه القاسي
ومركبك تبكي على شراعه
وما يفيدك عقبي إمواسي
والليالي دوم خداعة