يا حاسدي هذا أنا جيت أو رحت
والواثق بنفسه ترى دايماً فوق
غالي وبعد مملوح ولا من تملحت
أزيد سعر الملح ويخلص من السوق

ما هزني رايك أسريته أو بحت
سكوتي ما هو خوف لكن من الذوق
ما جادل الجاهل وإذا صاح ما صحت
أخاف بيني وبينه تضيع الفروق

ما كنت في عيوني عشان أزعل إن طحت
ولا كل واحد كلمته تلمس العوق
يبقى القمر عالي وتبقى البشر تحت
كل يعرفه وما يعرف أي مخلوق

في الناس لي مبدأ شعار أنحته نحت
ودك تشوف الشخص أخذ منه منطوق
ولا إنت لا ذميتني أو تمدحت
ترى القرادة ما درت عنها النوق

ما هو غرور اللي أقوله وصرحت
بالزين أخذ عيني وتعال اسكن الموق
النخلة ما تعطي الرطب مهما لوحت
تجني رطبها يوم ترقى للعذوق

بعض البشر يحرجك من ذوقه البحت
والبعض لو ببلاش ما يسوى في السوق
وهالنوع لا صادفني صديته ورحت
عشان يعرف حجمه ويصحى ويفوق