قدر قدر وتمر في بالي وأغني لك قدر
عكس السنين الماضية وعكس السنين الضايقة
مريت في بال الظلام وكنّك الشمس وقمر
ومريتني مشتاق يا طيف سنين أعانقه

تزورني وكلي ظما وتصير لي غيم ومطر
وتبسم صحاري خاطري وتصير بعدك وارقه
كل ما ذكرتك أبتسم وتمر في بالي صور
والبوم ذكرانا أنام ومن غلاك أعانقه

لمست كفك بالحلم وأقوم أنا بكفي عطر
وأشم عطرك في يدي وأقوم وأنا رايقة
وأرحل بطيفك يا غلاي بعيد لأهداب القمر
كل ما برق لامع غلاك الروح جات تسابقه

كل يوم يكبر بي غلاك وعاش ما عمره صغر
كذاب لي قال الغلا يصغر لشخص تفاوقه
أنا أعيشك كل لحظة وكل ساعة بالعمر
وأضمك بروحي غلا وذكراك فيني غارقه

شفت القصايد كلها في داخلي فيها أثر
غيرتها لكن بكت لبيات دمعة حارقه
حاولت أغير قافيتها شفت تفكيري قدر
وحاولت أغير عجزها حسّيت تبكي شاهقه

خليتها مثل السنين الماضية درس وعبر
محال أغير حرف واحد قلتها وكلي ثقه
واليوم أغني لك وأقول يا حص البحر
غصبًا على أضعاف النفوس اللي من اسمي ضايقه