ما سألتوا صاحب النظرة الخجولة
كيف يسهرني وله وجه صبوح
كيف يظلمني وله طهر الطفولة
كيف يسكني وهو دايم يروح

وكيف أنا ألقى ربيعه في فصوله
دام كذبه صادق وصدقه مزوح
له صفات تورد العاشق ذهوله
مستكين وصامت وكله جموح

أصعب الأشياء وأكثرها سهولة
أغمض الأشياء وأكثرها وضوح
سهل تغرم به وصعب إنك تنوله
غامض ف طبعه وواضح في الجروح

أسعد بشوفه ولكن ما أطوله
كني الوادي وهو أعلى السفوح
يبتسم لا منهم عني حكوا له
ولا حكوا لي عنه أعماقي تنوح

لي بقلبه شي لكن ما يقوله
وله بقلبي كل لكني أبوح
كنه الغيمة وأنا أرجي هطوله
ما نزل غيثه ولا برقه يلوح

ما عرفتوا ليه تسهرني فعوله
وليه يسكني وهو دايم يروح
هو يبيني بس اطباعه خجولة
وما يبي أغفى وهو وجهه صبوح